Əsas yeniliklərdən biri özəlləşməyə açıq elan edilən dövlət müəssisələrinin satışı üzrə hərraclarda ictimaiyyət nümayəndələrinin də iştirakının təmin olunmasıdır. Yəni ictimaiyyət nümayəndələri bu prosesə daha rahat və maneəsiz şəkildə qoşula, hərracların gedişini izləyə bilir: “Eyni zamanda Əmlak Məsələləri Dövlət Komitəsi hərraclarla bağlı kifayət qədər geniş informasiya resursları yaradıb. Özəlləşdirmə Portalından həm hüquqi və fiziki şəxslər, həm də mətbuat nümayəndələri dövlət əmlakının özəlləşdirilməsi ilə bağlı istənilən məlumatları əldə edə bilər. Yəni əvvəlki dövrlərdən fərqli olaraq, indi dövlət əmlakının özəlləşdirilməsi çərçivəsində keçirilən hərraclarla bağlı ictimai məlumatlandırma çox yüksək səviyyədə təşkil olunur. Mən özüm hərracları çox yaxından izləyirəm və görürəm ki, Əmlak Məsələləri Dövlət Komitəsi potensial alıcıların hərraclarda iştirak edə bilməsi üçün hər cür şərait yaradıb. Halbuki əvvəlki özəlləşdirmə proqramlarında belə bir qayda var idi ki, hərraclarla bağlı qabaqcadan iştirakçı qismində ərizə verməliydi. İndi isə belə bir qayda yoxdur və istənilən şəxs sərbəst şəkildə hərraclara qoşula bilər. Həmçinin prosesin özünün şəffaflığı, mətbuat və ictimaiyyət nümayəndələri üçün açıq olması, hərraclar barədə ictimaiyyətə həm əvvəlcədən, həm də sonradan məlumatların operativ şəkildə çatdırılması özəlləşdirmənin bu mərhələsinin ən mühüm yenilikləridir. Biz də bu prosesdə müəyyən mənada həm izləyici, həm də iştirakçı formasında çıxış edirik. Yəni bizim Əmlak Məsələləri Dövlət Komitəsinin özəlləşdirmə ilə bağlı keçirdiyi hərraclar barədə kifayət qədər məlumatımız var. Həqiqətən də indi özəlləşdirmə prosesi istənilən maraqlı şəxslər və təşkilatlar üçün kifayət qədər əlçatandır”. Məlumatlandırma xidmətləri sayəsində biznes fəaliyyəti ilə məşğul olan sahibkarlar bu hərraclarda daha fəal iştirak edir: “Prosesi yaxından izləyən şəxs kimi deyə bilərəm ki, hərraclarda iştirakçılıq səviyyəsi normaldır. Yəni əvvəlki dövrlərdə təşkil olunan hərrac prosesləri ilə müqayisə aparsaq, indiki hərraclarda iştirak edənlərin sayı çoxdur. Özünü sahibkar kimi təsdiq etmək istəyən, dövlətin satışa çıxardığı əmlaklara, kiçik və orta müəssisələrə sahib olmağı arzulayan hər kəsi bu hərraclarda fəal iştiraka dəvət edirəm.

Təqdirəlayiq haldır ki,  Azərbaycan dövləti iqtisadi inkişafı təmin etməklə yanaşı, ekoloji məsələlərə də xüsusi diqqət yetirir. Biz  artıq Azərbaycanda ekoloji sahədə iri və ən müasir texnologiyalara əsaslanan Bərk  məişət tullantılarının yandırılması zavodunun  tikintisi layihəsini uğurla həyata keçirmişik. Azərbaycandakı əlverişli mühit bizə bu mühüm layihəni  keyfiyyətlə və vaxtında icra etməyə imkan yaratdı. Ölkədəki səriştəli kadr potensialını nəzərə alaraq, biz zavodun idarə edilməsinə daha çox yerli mütəxəssisləri cəlb etmişik. Gələcək illərdə zavodun idarəçiliyi tamamilə azərbaycanlı mütəxəssislər tərəfindən həyata keçiriləcək. Bütün bunlar isə Azərbaycandakı əlverişli  işgüzar şəraitin, dövlətin bu sahəyə yüksək diqqətinin gösəricisidir.

London şəhərində Azərbaycanın biznes və investisiya mühitinə həsr edilmiş Azərbaycan Günündəki çıxışından

Azərbaycanın qazandığı nailiyyətləri, xüsusilə son 10 ildə əldə etdiyi uğurları, ölkə iqtisadiyyatının şaxələndirilməsi istiqamətində görülən işləri yüksək qiymətləndirəm. Bu ilin iyul ayında Bakıda olarkən sürətli inkişafın şahidi oldum və qısa müddətdə görülən işlər məni təəccübləndirdi. Azərbaycanda iqtisadiyyatın şaxələndirilməsi iqtisadi inkişafın əsas hədəflərindəndir. Bankın Azərbaycana dair ölkə strategiyasını Azərbaycan-2020 İnkişaf Konsepsiyasına uyğun hazırlayırıq və bu konsepsiya əməkaşlığımızın daha da genişləndirilməsi üçün geniş imkanlar yaradır. AYİB növbəti illərdə də Azərbaycanda fəaliyyətini özəl sektorun dəstəklənməsi və qeyri- neft sektorunun inkişafı istiqamətlərinə yönəldəcəkdir. Hesab edirəm ki, AYİB qərargahında “Azərbaycan Gün”ünün keçirilməsi çox əlamətdar hadisədir və Azərbaycanın uğurlarının tanıdılmasına, habelə əlaqələrimizin inkişafına öz töhfəsini verəcəkdir.

London şəhərində Azərbaycanın biznes və investisiya mühitinə həsr edilmiş Azərbaycan Günündəki çıxışından